Isinulat ni:. Shela Mae Muris
Genre: Lovestory/horror/tragic
BAGONG lipat ang pamilya ni Badong sa baryo Pilapil. Umalis sila sa dati nilang tinitirahan dahil sa trahedyang nangyari sa kanyang asawa na walang awang ginahasa ng anim na lalake, na siyang naging dahilan ng pagkamatay nito.
Hindi na nahanap pa ang mga salarin, kaya’t minabuti na lamang ni Badong na umalis sa lugar upang ilayo ang nag-iisang anak nila ni Myrna, si Manilyn.
Si Manilyn ay nasa wastong gulang na. Maputi ito gaya ng kanyang ama at balingkitan gaya ng Ina. Masasabing habulin ng lalaki ang huli dahil sa hubog ng kanyang katawan na sinabayan pa ng maamong mukha. Mahaba ang buhok nito at matangos ang ilong. May mala-rosas na labi at maamong mga mata.
Maliit lang ang baryo Pilapil kung kaya’t nakilala agad ni Badong ang kanyang mga bagong kapit-bahay. Payapa naman ang kanilang pamumuhay, ‘di tulad ng buhay nila noon sa Maynila. Isang magsasaka si Badong at si Manilyn naman ay naiiwan sa bahay upang mag asikaso ng kanilang mga makakain.
Isang araw, habbang nagluluto si Manilyn ng kanilang tanghalian ay aksidenteng napadaan si Richmond sa tapat ng kanilang bahay. Nalanghap nito ang amoy ng isang masarap na putahe. Napalingon ito sa tapat ng pinto at bumungad sa kanya ang isang napakagandang dalaga.
Si Richmond ay anak ng isang mayamang pamilya sa kanilang lugar, kaya’t hindi nakapagtataka na may hitsura ito. Maputi rin ito at matangkad, may matangos na ilong at mapupulang mga labi.
Sa unang sulyap ni Richmond kay Manilyn ay tila nahulog na agad ang loob niya rito. Ngunit isang babala ang biglang pumasok sa kanyang isip. Hindi sila maaring magkagusto sa isang mortal na tao. Halos lahat ng taga baryo ay alam ang sikreto ng pamilya nila Richmond. Ngunit walang ni isa sa kanila ang nais pang manggulo dahil hindi naman nananakit ang mga ito.
Si Richmond ay isang bampira. Siya ang nag-iisang anak nina Don Juan at Donya Melissa. Sila ay nakisalamuha sa mga tao upang itago ang totoo nilang pagkakakilanlan. Sila na lamang ang natitirang lahi ng mga bampira, kung kaya’t minabuti na lamang nilang magtago kaysa ubusin sila ng mga Lobo.
Nagsanay rin sila na kumain ng pagkain ng tao nang sa gayon ay hindi maramdaman ng mga Lobo ang kanilang presensya.
Hindi napansin ni Richmond na napatagal na pala ang titig niya kay Manilyn at natulala na ito. Napansin naman siya ni Manilyn kaya’t nilingon siya nito. Napangiti ang huli nang makita ang isang gwapong lalaki na nakatitig sa kanya. Mayamaya pa ay dumating si Badong galing sa bukid at napansin nito si Richmond na nakatingin sa kanyang anak.
“Jijo… baka matunaw ‘yang anak ko,” pabirong wika ni Badong.
“Ahh… pasensya na po mang Badong, napadaan lang ako sa bahay n’yo, ang bango kasi ng niluto ng anak mo, eh.” nahihiyang tugon ni Richmond.
Niyaya ni Badong si Richmond na pumasok muna upang saluhan silang kumain ng tanghalian, na siyang pabor din naman sa kanya dahil malalapitan niya si Manilyn.
Ipinakilala ni Badong si Manilyn kay Richmond at gayon din ang ginawa ng binata. Napansin ni Badong na namumula si Manilyn tanda na natitipuhan nito ang binata. Hindi naman tutol si Badong kung sakali dahil nasa wastong gulang na ang kanyang anak at gayon din ang lalake.
Matapos nilang kumain ay nagpaalam na si Richmond. Nang makaalis ang binata ay biglang nagsalita si Badong.
“Manilyn… mukhang may naamoy akong pag-ibig, ah,” pang-aasar niya.
“Papa naman, pwede naman siguro ‘diba?” pag-amin ni Manilyn.
Simula no’n ay araw-araw nang dumadaan si Richmond upang silipin ang dalaga, hanggang sa manligaw na siya. Hindi ito alam ng mga magulang ni Richmond dahil siguradong tutol sila sa kanilang pag-iibigan.
Lumipas ang ilang buwan ay nakamit na rin ni Richmond ang matamis na pagsang-ayon ni Manilyn na magpakasal sa kanya. Sobrang saya ni Richmond nang araw na iyon, Ngunit may bigla itong naamoy na tila kakaiba. Nakaramdam si Richmond ng hindi maganda kaya’t tumakbo ito palayo kay Manilyn at umuwi sa kanilang bahay.
“Ama, Ina… may naramdaman akong may Lobo sa paligid, naamoy ko sila at naramdaman ko rin ang kanilang presensya,” nag-aalalang wika ni Richmond sa kanyang Ama’t Ina.
Hindi napansin ni Richmond na sinundan pala siya ni Manilyn at nasa labas ito ng kanilang mansyon.
“Rich! Bakit ka tumakbo?” sigaw ni Manilyn sa labas ng gate.
Nagalit si Don Juan dahil sa ginawa ni Manilyn kaya’t Pinadukot niya ito at ipinakulong sa loob ng isang kwarto.
“Rich! Sino ang babae na ‘yon?” pasigaw na tanong ni Don Juan
“Patawad po Ama, siya po ang aking kasintahan,” lumuluhang saad ni Richmond.
Hindi napansin ni Richmond na sinundan pala siya ng isang lalaki na hinihinalang Lobo. Pwersahan nitong binuksan ang gate at pumasok sa loob.
Lumabas naman si Don Juan at lakas loob nitong hinarap ang Lobo. Inakala niya na nag-iisa lamang ito, ngunit walang kisap-mata’y isa-isang nagsulputan ang mga mababangis na Lobo na kapwa nakahanda sa anumang digmaan. Iba’t iba ang kulay nito na sinlalalaki ng kalabaw at may mapupulang mga mata. May kuko ito na matatalas at pangil na tila isang kutsilyo sa sobrang talim.
Mayamaya pa ay biglang lumakas ang hangin at dumilim ang langit, tila nagbabadya ng isang digmaan. Ang malakas na sikat ng araw ay napalitan ng dilim. Lumabas din ang buwan na kulay dugo. Ang mga halaman sa paligid ay nalanta at ang mga hayop ay nanghina.
Nagsimula nang magbago ang wangis ni Don Juan. Lumaki ito ng bahagya at naging agresibo, napalitan din ng kulay ang kanyang mga mata ng kulay itim na may pula sa gitna, ang mga kuko nito ang tumalas na maihahalintulad sa tigre. Ang pangil nito at humaba na tila isang makamandag na tinik.
Nagsilabasan ang mga tao sa buong baryo. Ang lahat ay natakot at nagsisigawan. Ang iba ay nawalan ng malay, habang ang iba’y umiyak. Ang tahimik na baryo ay binalot ng isang karahasan...